Hafin er skráning í fimm daga jólaferð til Gdansk sem er söguleg og falleg hafnarborg í Póllandi sem býður upp á menningu, verslun og veitingastaði, glæsilegan gamlan bæ með litríkum húsum, þröngum steingötum og fallegum kirkjum,.

Borgin er einnig þekkt fyrir handverk, jólamarkað og fjölbreytt úrval af veitingastöðum. Glitrandi jólaljós, feneyskar hringekjur, skreytt jólatré, súkkulaðihúðaðir ávextir, glögg og frábært jólaeldhús.

Þetta eru aðeins nokkrar af þeim upplifunum sem þú getur upplifað á þessum töfrandi jólamarkaði í Póllandi. Sannkölluð unun fyrir skilningarvitin. Sjá nánar undir Ferðir 2026

Nú stendur yfir skráning í nýja dagsferð sem verður farin 20 ágúst en þá verður farið í heimsókn til myndlistakonunnar Erlu Axelsdóttur. Erla var alin upp hér í Kópavogi á Kársnesbrautinni en hún hefur byggt sér vinnustofu og sýningarsal á fallegum stað við Selvatn sem er leynd perla í Miðdalslandi sem er rétt fyrir utan þéttbýlið. Einnig mun eiginmaður Erlu hann Guðfinnur sem margir Kópavogsbúar kannast við úr Nesti í Fossvogi leiðsegja okkur um garðinn sem inniheldur mikið af listaverkum eins og td styttunum sem stóðu við Nesti í Fossvogi. Síðan heimsækjum við aðra perlu sem er okkur enn nær og er Kríunes við Elliðavatn.

Sjá nánar undir Ferðir 2026

Fyrri dagsferðin var farin 28 maí sl. til Grindavíkur og skemmtilegur hringur keyrður um Hvalsnesið með viðkomu í Hvalsneskirkju þar sem við fengum leiðsögn um og farið þar á Kaffi Golu sem er rekin af Kópavogskonu.

Bestu þakkir til ykkar allra sem nutu orlofsferða okkar á síðasta ári en nú er komið að því að kynna ferðir 2026 sem eru komnar hér á síðuna og skráning er þegar hafin.

Orlofsnefndin eins og alltaf áður hefur lagt sig fram um að velja og skipuleggja vonandi frábærar ferðir að kanna nýja og spennandi áfangastaði. Við byrjum ferða árið strax eftir páska, í apríl með glæsilegri átta daga ferð með dásamlegri skemmtisiglingu um Dóná.  Í júní verður ferðast innanlands, farin fjögra daga ferð um norðurland. Síðan verða tvær spennandi ferðir í boði í október fyrst 6 daga ferð til Króatíu og síðan 8 daga Spánarferð til Barselóna og Sitges. Dagsferðir sumarsins verða kynntar síðar. Lesið nánar um allar ferðirnar hér inni á heimasíðunni undir Ferðir 2026.

Þar sem afar stutt er í fyrstu ferðina skemmtisiglinguna á Dóná 7-14 apríl þarf að hafa hraðar hendur með skráningu í þá ferð svo þar verður fyrstur kemur fyrstur fær, áhugasamar skrái sig því sem fyrst.

Miðvikudaginn 27. ágúst heimsækjum við  Gljúfrastein, fáum leiðsögn um safnið og skoðum m.a. nýja sýningu sem nefnist: Skrýtnastur er maður sjálfur er yfirskrift örsýningar sem opnaði 25. maí í móttöku Gljúfrasteins og mun standa fram í September. Yfirskrift sýningarinnar vísar í grein Halldórs úr bókinni Úngur eg var, sem kom út árið 1976. Bók Auðar Jónsdóttur, sem hún skrifaði um afa sinn 2016, ber einnig heitið Skrýtnastur er maður sjálfur. Förum síðan í góðan málsverð á veitingahúsinu Blik Bistro. Verð: 6000.-kr.  Innifalið er Rútuferðin, aðgangseyrir í Gljúfrastein og leiðsögn á safninu og hádegismatur á Blik Bistro. Brottför kl 10:00 frá Digranesvegi 7, Kópavogi (Áætlaður komutími í Kópavog er um kl 15:00)

Haustlitir á Þingvöllum þriðjudaginn 23. september Brottför kl 09:00 frá Digranesvegi 7, Kópavogi, ekið að Hakinu Þingvöllum. Þar mun Guðni Th. Jóhannesson landvörður, sagnfræðingur og fyrrv. forseti eða annar landvörður taka á móti okkur í Snorrastofu, segja okkur sögur og svara spurningum. Skoðum síðan safnið og njótum á flotta útsýnispallinum. Þær sem vilja ganga niður Almannagjá þar sem rútan sækir þær. Síðbúið hádegisverðar hlaðborð verður á veitingastaðnum Hvíta húsinu Selfossi og áætlaður komutími í Kópavog um ca kl 15:00. Verð: 6000.-kr. 

Nokkur sæti til í 5 daga aðventuferð til fallegu Riga í Lettlandi 2.-6. desember 2025 sjá nánar á heimasíðu undir Ferðir 2025

Lesið nánar um ferðina undir hnappnum hér ofar Ferðir 2025 skrollið þar niður…

Síðustu sætin í boði í Vestfjarðarhring 16. – 19. ágúst vegna forfalla, fyrstur kemur fyrstur fær!

Nú hafa ferðir ársins 2025 verið að tínast hér inn á heimasíðuna og umsóknirnar farnar að streyma inn, fyrstur kemur fyrstur fær því er best að skrá sig í ferð sem allra fyrst því skráningartíminn er stuttur núna.

Ævintýrið byrjar 3. apríl með beinu flugi til Porto í Portugal sem er nýr áfangastaður hjá okkur.

Vorferðin innanlands verður um suðurland þar sem konur munu njóta fagurrar náttúru og þæginda á Hótel Klaustri við Kirkjubæjarklaustur sem er rómað fyrir góðan mat og þægindi.

Síðan er London í byrjun maí til að sjá hina stórkostlegu Abba Voyage sýningu.

Í ágúst er stefnt á 4 daga hringferð um Vestfirði með td siglingu út í Jökulfirði með landtöku á Hesteyri.

Suður Frakkland verður heimsótt í september og farið í skoðunarferðir út frá hinni fögru borg Nice. Nánari ferðalýsingar um allar ferðirnar má sjá með því að slá á flipann Ferðir 2025 hér ofar á síðunni.

Fyrirhuguð er aðventuferð en nánar um hana síðar, einnig eru í vinnslu dagsferðir svo endilega fylgist vel með heimasíðunni áfram.

Skráning er hafin í fyrstu ferðir ársins 2025 sem eru til Porto í Portúgal 3-10 apríl og til London á Abba Show 09. -13. maí. Nefndarkonur eru að leggja lokahönd á aðrar ferðir fyrir 2025. Munu þær birtast hér á síðunni. Við stefnum á nýja og spennandi áfangastaði og ferðumst bæði innan lands og utan.

Því miður eru flugfélögin að herða hjá sér reglur, því fáum við stuttan frest til að staðfesta bókanir með staðfestingargjaldi sem er alltaf óendurkræft. Viljum því benda konum á að skoða sínar ferðatryggingar með tilliti til þess. Við vonum að þið sýnið því skilning að umsóknarfrestur er styttri en verið hefur og greiða þarf staðfestingargjald snemma en lokagreiðsla er eins og áður ca 8 vikum fyrir brottför ferðar.

Vorferðirnar sem er farið að bóka í eru ferð til London til að sjá sýndarveruleika sýningu með Abba í maí með gistingu á besta stað og ferð til Porto í Portúgal byrjun apríl. Porto ferðin er vikuferð, frá fimmtudegi til fimmtudags 03.-10. apríl. Gist er í 7 nætur á 4 stjörnu hóteli, morgunverður og 5 kvöldverðir eru innifaldir í verði. Íslensk fararstjórn. Dagskráin er spennandi með tveimur frjálsum dögum (kvöldmatur ekki innifalinn þá daga, en sjálfsagt að hópa sig saman á veitingastað ef áhugi er á). í boði verður Portvín vínsmökkun, vinnustofa þar sem við málum okkar eigin flís, skoðunarferð á Tuk Tuk bíl, og við lærum að búa til Portúgals góðgæti (Pastel de Nata).

Saðfestingargjald þarf að greiðast fyrir 16. janúar og er 40 þús. Fyrstur kemur fyrstur fær svo endilega skráið ykkur sem fyrst til að taka frá sæti í þessum skemmtilegu ferðum.

Takk, takk, kæru konur fyrir frábært ferðaár sem var að enda en síðustu ferð ársins 2024 lauk nú í vikunni. Það var jólamarkaðsferð til Edinborgar þar sem 38 konur ásamt fararstjóra skemmtu sér vel þó veðrið hefði mátt vera betra.

Rúmlega 200 konur hafa þetta árið notið ferðalaga orlofsnefndar í fjölbreyttum ferðum innanlands og utan og skapað minningar í minningarbankann. Þökkum við þeim öllum ánægjuleg samskipti, fyrir þau erum við nefndarkonur afar þakklátar.

Við vitum að margar þessara kvenna hefðu ekki fengið tækifæri til að njóta svona ferðalaga ef ekki væru lögbundnar orlofsnefndir húsmæðra í landinu. Ýmsar ástæður gætu legið að baki s.s. félagslegar ástæður, margar konur orðnar ekkjur eða hafa ekki ferðafélaga og ekki síst fjárhagslegar ástæður. Flestir vita eða ættu að vita að margar eldri konur fengu á sínum tíma ekki barnaheimilispláss fyrir börnin sín, samfélagið bauð þeim ekki upp á annað en að vera heimavinnandi. Þessar konur uppskera því svívirðilega lítið úr lífeyrissjóðum í dag og miklu minna en karlar. Meðan ástandið er enn svona á Orlof húsmæðra svo sannarlega rétt á sér.

Orlofsnefndin